Dünyanın ən zəngin adamı – “Amazon” şirkətinin sahibi Ceff Bezos “National Enquirer” “sarı” nəşrinin rəhbərinin onu açıq-saçıq fotoşəkillərini dərc etməklə şantaj etdiyini açıqlayıb.

Bu barədə “The Guardian” məlumat yayıb.

Bezosun sözlərinə görə, Devid Pekerin vəkilləri onunla əlaqə yaradaraq, redaksiyaya qarşı şikayətini geri götürməyəcəyi təqdirdə telefon ismarıclarını (SMS) və intim fotoşəkillərini yayacaqları ilə hədə-qorxu gəliblər.

Yanvar ayının əvvəlində Bezosun 25 illik həyat yoldaşı Makkenzidən ayrılması xəbəri yayılıb. Cütlüyün boşandıqlarını ictimai şəkildə elan etməsindən 48 saat əvvəl adıçəkilən nəşrin onun barəsində jurnalist araşdırmasına başladığını və keçmiş teleaparıcı, 49 yaşlı Loren Sançezlə gizli eşq macərası yaşadığını öyrəndiyini Bezosa bildirib.

Qalmaqalın yaranmasından sonra Bezos şəxsi həyatı ilə bağlı məlumatların hansı şəkildə sızdığını müəyyən etmək üçün şəxsi xəfiyyələr tutub.

Ötən gün Bezos  jurnalın rəhbərliyinin, başda Devid Peker olmaqla, onun Sançesə göndərdiyi şəxsi fotoları yaymaqla şantaj etdiyini bildirib. Şəkillərin yayılmaması üçün Bezos istintaqı dayandırmalı və ona qarşı hazırlanan dosyenin siyasi sifarişli olmadığını ictimai şəkildə elan etməlidir.

Qeyd edək ki, Bezos ABŞ prezidenti Donald Trampın qatı əleyhdarlarındandır. Onun sahibi olduğu “Washington Post” qəzeti Ağ Ev rəhbərini mütəmadi olaraq tənqid atəşinə tutur. “National Enquirer” jurnalının naşiri Devid Peker isə ABŞ mediasında Trampın ən yaxın müttəfiqlərindən sayılır.