“Küçəyə nə taksilər, nə də təcili yardım maşınları gəlir”

Sabunçu rayonunun Ramana Şuşa qəsəbəsinin sakinləri yaşadıqları ünvanın asfalt örtüyünün olmamasından narazıdır.

Bu barədə Minval.info-ya danışan şikayətçilər deyir ki, sözügedən küçəyə diqqət ayrılmadığından buraya ad belə verilməyib. Bununla bağlı Azərbaycan Avtomobil Yolları Agentliyinə müraciət etsələr də, bu, cavabsız qalıb.

“Vəziyyət acınacaqlıdır. Küçədə yüzlərlə insan yaşayır. Qocalar, məktəblilər bu yollarla gedərdən əziyyət çəkir. Aidiyyatı qurumlardan xahiş edirik, bu qəsəbəyə əncam çəkin” – şikayətçilər söyləyir.

Sakinlər bildirir ki, qəsəbədə insanlar çox çətinliklə hərəkət edir:

“Çox deyil, mərkəzi yolla cəmi bir kilometr məsfəmiz var. İnanın ki, nə taksilər, nə də təcili yardım maşınları buraya gəlmir. Yollarımız yaman gündədir. Gölməçələr əmələ gəlir, insanlar güclə hərəkət edir”.

Onlar eyni zamanda küçədə antisanitariya vəziyətinin hökm sürməsindən gileylənir.

Sakinlər tezliklə qeyd edilən problemlərin aradan qalxmasını istəyirlər.