“Azərenerji” ASC sədrinin oğlu və qardaşı bu məsələni şəhərin tanınmış restoranlarının birində bayram ediblər

AzEuroNews.com ► Yarım ildən artıqdır ki, başçısız qalan Xətai rayonu “Azərenerji” ASC-nin sədri Baba Rzayevin kurasiyasına verilir. Bu barədə AzEuroNews.com – a daxil olan məlumatda bildirilir. Səhihliyinə etibar etdiyimiz informasiya mənbəmizin iddiasına görə “Azərenerji” ASC-nin sədri Baba Rzayevin qarfaşı Emin Rzayev Xətai rayon icra başçısı təyin edilmək üzrədir. Artıq Emin Rzayevin sənədlərinin prezidentin iş stolunun üstündə olduğu və yaxın günlərdə qərarın verilə biləcəyi ehtimal edilir.

Mənbəmiz Emin Rzayevin Xətai icra başçısı təyin edilməsi qərarının verilə biləcəyini onunla əsaslandırır ki, bir neçə gün öncə Baba Rzayevin oğlu Fuad Rzayev və əmisinin icra başçısı təyin ediləcəyi ilə bağlı paytaxtın tanınmış bir restoranında yaxın dostlarına qonaqlıq verib.  Həmin qonaqlıqda Fuad Rzayev bildirib ki, yaxın günlərdə Xətai rayonu onların nəzarətinə veriləcək. Mənbə qeyd edir ki, “Azərenerji” ASC sədrinin oğlu əmisi Emin Rzayevin sənədlərinin prezidentin iş stolunun üstündə olduğuni və hər an sərəncamın verilə biləcəyini sevincək şəkildə dostları ilə bölüşüb.

Mənbəmiz həmçinin qeyd edir ki, artıq Emin Rzayev rəhbərlik etdiyi “Santral Elektrik” LTD şirkətini qardaşı Baba Rzayevin qaynı İlham Həsənova təhvil verib. Bildirək ki, “Santral Elektrik” LTD şirkətinə rəhbərlik etmiş Emin Rzayev qardaşı Baba Rzayevin sayəsində həm milyonçuya çevrilib, həm də böyük biznes imperiyasının əsas idarəedicisi olub.Məlumat üçün qeyd etmək istəyirik ki, paytaxtın Dərnəgül şossesində yerləşən “Santral Elektrik” LTD şirkətinin səhmlərinin rəsmi sənədlərə görə 100  faizi Baba Rzayevin ailəsinə məxsusdur. “Santral Elektrik” LTD Ədliyyə Nazirliyində 2003-cü ildə qeydiyyata alınıb. Məhz Baba Rzayevin sayəsində “Santral Elektrik” illərdi milyonluq layihələr qazanıb.

Məlumatlara görə, “Legrand” (Fransa), “Pirelly” “GEWISS”, “KEMMR.I” (Finlandiya), “Vortice” (İtaliya), “Stanley” (ABŞ), Philips, Osram “Dewallt”, “Massive” və başqa şirkətlərin Azərbaycanda rəsmi distribütoru da “Santral Elektrik”dir.