Yanvarın 1-dən başlanan avtomobillərin texniki baxışının birinci mərhələsi  mayın 1-i bitir. Bəs görəsən bu müddət ərzində istifadəyə yararsız avtomobillər aşkarlanıbmı?

Baş Dövlət Yol Polis İdarəsinin İctimaiyyətlə əlaqələr şöbəsinin rəisi Kamran Əliyev Modern.az-a bildirib ki, istənilən halda texniki baxış zamanı nasazlıq aşkarlanarsa, həmin nəqliyyat vasitəsi texniki baxışdan keçirilmir.

“Avtomobilin texniki nasazlıqlarının aradan qaldırılması üçün zaman verilir. Əgər nəqliyyat vasitəsinin sahibi bacarırsa, nasazlıqları özü aradan qaldırır və yaxud da texniki təmir stansiyasında nasazlıqların aradan qaldırılmasını həll edir. Daha sonra aşkarlanan nasazlıqların aradan qaldırılması ilə bağlı arayış təqdim edir.  Nəqliyyat vasitəsi təkrar müayinə olunduqdan sonra nəqliyyat  vasitəsi texniki tələblərə cavab verirsə, saz vəziyyətdədirsə texniki baxışdan keçmiş hesab olunur və ona avtomobilinin istifadə edildiyi müddətə uyğun 1 və ya 2 illik texniki baxış talonu verilir. Texniki nasazlığı olduğu üçün texniki baxışdan keçməyən avtomobillərin sayı ilə bağlı tam məlumat verə bilmərəm, çünki texniki baxış 11 qeydiyyat-imtahan məntəqəsində keçirilir”.

Kamran Əliyev bildirib ki, MDB istehsalı olan nəqliyyat vasitələrinin texniki baxışdan keçmə müddəti 1 həftə sonra, mayın 1-i bitir.

“MDB  istehsalı olan köhnə minik avtomobillərinin texniki baxışdan keçmə müddəti yanvar ayının 1-dən mayın 1-nə qədərdir. Mayın 1-dən avqustun 1-ə qədər xarici dövlətlərdə istehsal olunan və onların baza modeli əsasında MDB dövlətlərində istehsal olunan minik avtomobillərinin texniki baxışdan keçmə müddətidir.

Avqust ayının 1-dən oktyabr ayının sonuna qədər isə avtobusların və yük avtomobillərinin texniki baxışdan keçməsi üçün müddətdir.

Texniki baxışdan təyin olunan müddətdə keçməyən sürücülər bilməlidir ki, nəqliyyat vasitəsini texniki baxışdan keçirmədən idarə etməyə görə fiziki şəxslər 50 manat, vəzifəli şəxslər 100 manat, hüquqi şəxslər 300 manat cərimə olunur”.