Kikboksinqin K-1 versiyası üzrə həvəskarlar arasında dünya çempionu, Avropa ikincisi, peşəkar kikboksinqdə bir neçə kəmərin sahibi, “Altın Qurd” ləqəbli Bəhram Rəcəbzadə tanınmış idmançımız Zabit Səmədovla döyüşmək istəyir.

Modern.az xəbər verir ki, o, bunu oxu.az-a müsahibəsində deyib.

Cənubi azərbaycanlı idmançı (+93 kq) onunla eyni çəkidə olan “Mauqli” ilə döyüşüb Azərbaycanda ən güclünün kim olmasının bilinməsini çox istədiyini qeyd edib:

“Təbii ki, Zabitlə döyüşmək istəyərəm. O, bizim, hər bir türkdilli vətəndaşın fəxridir. Güclü idmançıdır, Azərbaycan bayrağını qaldırıb. Zabitlə “salam”ımız var.

Onunla öz gücümü sınamaq istəyərəm. Söhbət burada kimin qalib gəlməsindən getmir. İkimiz də beynəlxalq yarışlarda Azərbaycanı təmsil edirik. Amma istəyərəm ki, o da öz gücünü ortaya qoysun, mən də və Azərbaycanda bu çəkidə kimin güclü olduğu bilinsin”.