AzEuroNews.com /Bakı   Azərbaycanda Milli Şura sədri Cəmil Həsənli və AXCP sədri Əli Kərimli noyabrın 17-də Şəhidlər Xiyabanını ziyarət etmək istəyərkən polis tərəfindən saxlanılıblar. Onlarla birlikdə partiyanın 50-yə yaxın üzvü Səbael Rayon Polis İdarəsinə aparılıb. Məlumatı Meydan TV yayıb.

Hadisə ilə bağlı AXCP-nın mətbuat xidmətinin yaydığı məlumatda isə deyilir ki, Milli Şura Milli Dirçəliş Günü ilə əlaqədar Şəhidlər Xiyabanını ziyarət etməyi əvvəlcədən planlaşdırıb və bu barədə 1 gün əvvəl ictimaiyyət məlumatlandırılıb. Ancaq bugün səhər Şəhidlər Xiyabanına gedən yollar bağlanıb. Məlumata görə, idarəyə iki təcili tibbi yardım maşını çağırılıb.

17 noyabr Azərbaycanda Milli Dirçəliş Günü kimi qeyd olunur.

1988-ci il noyabrın 17-də Lenin adına meydanda (indiki “Azadlıq” meydanı) Ermənistanın Azərbaycana ərazi iddiaları irəli sürməsi ilə bağlı respublika və ittifaq hakimiyyətlərinin fəaliyyətsizliyinə etiraz olaraq fasiləsiz mitinq başlamışdı.

Yüz minlərlə insan iki həftə fasiləsiz olaraq Moskvadan Ermənistanın addımlarına son qoyulmasını tələb edirdi.

Dekabrın 4-dən 5-nə kecən gecə sovet qoşunları mitinq iştirakçılarına qarşı cəza tədbirləri həyat keçirdi, nəticədə onlarla adam yaralandı, bir nəfər həlak oldu.

Bununla belə, mitinq güclü hərəkatın başlanğıcını qoydu və bu 1991-ci ilin oktyabrında Azərbaycanın müstəqilliyinin elan olunması ilə nəticələndi.

1992-ci ildən 17 dekabr Milli Dirçəliş Günü Günü kimi qeyd olunur. 2006-cı ilin sonunadək bu bayram qeyri-iş günü idi. Lakin 2006-cı ilin sonunda parlament onu qeyri-iş günləri siyahısından çıxardı.